អតីតក្មេងវត្តអភិវឌ្ឍខ្លួនជានាយកក្រុមហ៊ុនមានចំណូល ៦ ម៉ឺនដុល្លារ ក្នុងមួយខែ
ស្ថិតនៅលើទីតាំងមួយកន្លែងក្បែរវត្តសំរោងអណ្ដែត ក្នុងសង្កាត់ភ្នំពេញថ្មី ជាយរាជធានីភ្នំពេញ ឃ្លាំងស្តុកទំនិញមួយត្រូវបានសាងសង់ដោយ មានដំបូលប្រក់ស័ង្កសី ក្នុងទំហំប្រមាណ ១៥ គុណ ២៥ ម៉ែត្រ។ នៅក្នុងឃ្លាំងនេះមិត្តយុវវ័យនឹងឃើញទូរកុងតឺន័រកកពីរត្រូវបានដាក់តម្រៀបក្បែរៗគ្នា។ ទូរកុងតឺន័នេះគឺសម្រាប់ក្លាសេត្រីសាលម៉ុន និងត្រីធូណា។ លោក ម៉ៅ វុត្ថា ដែលដើមឡើយគឺជាអតីតក្មេងវត្តរស់នៅវត្តបទុមវតីជាង ១០ ឆ្នាំមកនោះ បច្ចុប្បន្ន គឺជាអ្នកគ្រប់គ្រងឃ្លាំង និងជានាយកក្រុមហ៊ុន Ks Seastar Co. Ltd ដែលបាននាំចូលត្រីទាំងនេះពីបរទេស។ តើលោកមានប្រវត្តិតស៊ូយ៉ាងណាទម្រាំមានថ្ងៃនេះ? ក្នុងវ័យ ៣៣ ឆ្នាំ លោកម៉ៅ វុត្ថា មានស្រុកកំណើត នៅភូមិ ដាំស្ពៃ សង្កាត់ស្លាកែត ក្រុង-ខេត្តបាត់ដំបង និងជាកូនកំព្រាឪពុកតាំងពីកុមារភាព។ ជាយុវជនរស់នៅទីជនបទលោក ម៉ៅ វុត្ថា ក៏មិនខុសគ្នាអ្វីពី យុវជនដ៏ទៃ នោះទេ។ លោក បាន ជួយកិច្ចការងារធ្វើស្រែចម្ការ និងការងារផ្ទះម្ដាយ ហើយឆ្លៀតពេលទំនេរ…
