បាំងកក៖ ក្រុមហ៊ុន Saab របស់ប្រទេសស៊ុយអែតបានប្រកាសថាខ្លួនបានចុះកិច្ចសន្យាជាមួយរដ្ឋបាលសម្ភារៈការពារជាតិស៊ុយអែត (FMV) ដើម្បីផ្គត់ផ្គង់យន្តហោះចម្បាំង Gripen E/F ចំនួន៤គ្រឿងសម្រាប់ប្រទេសថៃ។ កិច្ចព្រមព្រៀងនេះមានតម្លៃប្រមាណ៥,៣ពាន់លានក្រូណាស៊ុយអែត (SEK) ត្រូវនឹងប្រមាណជា ៥៥០ លានដុល្លារ ហើយការដឹកជញ្ជូនគ្រោងធ្វើឡើងចាប់ពីឆ្នាំ២០២៥ ដល់ឆ្នាំ២០៣០។
ការចុះកិច្ចសន្យានេះធ្វើឡើងចំពេលដែលរដ្ឋាភិបាលថៃនិងស៊ុយអែតកំពុងប្រឈមមុខនឹងប្រតិកម្មយ៉ាងខ្លាំងពីសំណាក់អ្នកប្រើប្រាស់បណ្តាញសង្គមនិងសាធារណជន ក្រោយពីយោធាថៃបានប្រើប្រាស់យន្តហោះចម្បាំង Gripen C/D ដែលខ្លួនមានស្រាប់វាយប្រហារលើប្រទេសកម្ពុជាកាលពីខែសីហា។
កិច្ចសន្យារវាងក្រុមហ៊ុន Saab និង FMV រួមមានយន្តហោះ Gripen E ចំនួន៣គ្រឿង និង Gripen F ចំនួន១គ្រឿង រួមជាមួយនឹងឧបករណ៍ពាក់ព័ន្ធ ការគាំទ្រ និងការបណ្តុះបណ្តាល។ ក្នុងសេចក្តីប្រកាសព័ត៌មានរបស់ក្រុមហ៊ុន Saab បានលើកឡើងថាខ្លួនក៏បានចុះកិច្ចសន្យាជាមួយកងទ័ពអាកាសរាជថៃដើម្បីផ្តល់កញ្ចប់សំណងរយៈពេលវែងដែលរួមបញ្ចូលការផ្ទេរបច្ចេកវិទ្យាការពារជាតិនិងកិច្ចសហប្រតិបត្តិការឧស្សាហកម្មដ៏សំខាន់ផងដែរ។
 |
| Saab receives Gripen E/F order for Thailand |
លោក Micael Johansson ប្រធាននិងនាយកប្រតិបត្តិនៃក្រុមហ៊ុន Saab បានថ្លែងស្វាគមន៍ប្រទេសថៃដែលជាអតិថិជនថ្មីសម្រាប់យន្តហោះ Gripen E/F។ លោកបានបន្តថា៖ «ប្រទេសថៃបានជ្រើសរើសយន្តហោះចម្បាំងដែលទំនើបបំផុតនៅក្នុងទីផ្សារដើម្បីកសាងសមត្ថភាពយុទ្ធសាស្ត្រឯករាជ្យជំនាន់ក្រោយរបស់ខ្លួន»។
បច្ចុប្បន្ន កងទ័ពអាកាសរាជថៃកំពុងប្រើប្រាស់យន្តហោះចម្បាំង Gripen C/D ចំនួន១១គ្រឿងហើយគ្រោងនឹងទិញយន្តហោះស៊េរីថ្មី Gripen E/F ចំនួន៤គ្រឿងទៀតដើម្បីបន្ថែមសមត្ថភាពយោធារបស់ខ្លួន។